कळेना मला सुरुवात कशी करावी
म्हणून जाणीवेच्या मुठीतूनच हळुवार
सोडला मी अस्तित्वाचा बिंदू ....
या बिंदूभोवती गुराफटणे जमले नाही
कि चौकटीत राहणे मला जमले नाही ...
पूर्वी बायका नेहमीच प्राजक्ताच्या सुवासात
उभ्या,आडव्या,तिरक्या रेखत असत स्वतःला
आज तीच स्त्री स्वतःला मुक्तपणे
खुलावातांना दिसते प्रोग्रामच्या विस्तीर्ण प्रतलावर
जाणिवेचे रंग भराभर पसरत जातात
अन माझी पावले आभाळ झेलतात
नाही जमत मला जोखडात राहणे
' स्व ' च्या उन्नतीला क्षमतेने मी जोडले
म्हणूनच ठिपक्यांची रांगोळी कधी
मला जमलीच नाही
अन चौकटीत राहणेही ....!
-आरती बोराडे
